Archive for the ‘Pólitík’ Category
Á nýju ári
Gaman væri að hafa tíma til að blogga eitthvað. Margt að gerast hér sem og á föðurlandinu.
Svo ég segi eitthvað um mál málanna á Íslandi þessa stundina þá vonast ég til þess að vinstristjórnin láti ekki tiktúrur forsetans á sig fá. Hann hefur jú rétt til þess að skrifa ekki undir hvað sem er. Látið málið hafa sinn eðlilega gang og setjið þetta í þjóðaratkvæði. Samstaða vinstri flokkana er síðasta haldreipi Íslands, aðrir flokkar eru ekki stjórntækir og verða það ekki á næstunni.
Svona hefst bloggárið 2010, geypilega fallegt ártal.
Tags: Icesave
Greinargóð skrif um hrunið
Á bloggi Egils Helgasonar er ágæt grein um hrunið og ástæður þess eftir Andra Helgason. Er sjálfur sammála öllu því sem þar kemur fram. Held þessum hluta hér til haga þar sem hann hittir svo rækilega í mark.
Á Íslandi voru varla bankar fyrir 30 árum. Þetta voru eiginlega bara sparisjóðir eftir rússneskum fyrirmyndum. En svo vorum við komin með bankakerfi sem var 10 sinnum stærra en hagkerfi landsins — á rétt rúmlega 5 árum. Og rökin eru þau að seðlabankinn gat ekki stoppað þetta? Bara svona rétt til að setja þetta í samhengi. Ef bankakerfið í Póllandi, sem fyrir 30 árum var með sömu bankahefð og Ísland, hefði verið hlutfallslega jafnstórt miðað við höfðatölu, þá hefði það dugað til að sjá allri Evrópu fyrir bankastarfsemi.
En þetta verður svo miklu verra og svo miklu vitlausara því meira sem maður hugsar um það. Og um allt Ísland er fólk sem er alveg stórhlessa á því að “ríkið sé að ábyrgjast Icesave.” Bankakerfið sem hrundi var 20-30 sinnum stærra heldur en Icesave, lang mest af því tapi fellur utan Íslands. Kostnaður ríkisins við að taka á sig Landsbankann gæti orðið stærri en Icesave, sérstaklega ef enginn er að passa kassann. Kostnaður ríkisins af ástarbréfunum er áætlaður um 300 milljarðar króna. En við skulum eyða öllum tímanum í að kvarta yfir Hollandi og Bretum. Þetta er allt þeim að kenna, þeir áttu að stoppa okkur. Og ef það er ekki þeim að kenna, þá er það ESB að kenna að leyfa okkur að taka þátt í Evrópumarkaðnum en gefa okkur ekki barnaútgáfuna af lögunum þeirra sem skýra út hvernig innistæðutryggingar virka alls staðar í heiminum síðan í heimskreppunni 1929.
Það trúir því enginn (amk. ekki utan Íslands) að ein þjóð geti verið svona vitlaus, svona ábyrgðarlaus. Það dettur engum erlendum, eða heilvita, manni í hug að þetta hafi ekki verið ein risastór svikamylla. Og hvað gera svo Íslendingar? Eitt ár liðið frá hruni og tveir piltar varla með pungapróf eru dæmdir fyrir smásvik. Nefnd á vegum þingsins gefur litlar sem engar skýringar á af hverju dregst að skila skýrslu um málið. Engir erlendir aðilar hafa verið fengnir til að rannsaka málin, utan ein góðhjörtuð kona sem kom hingað til að tala við sjónvarpsmann. Hún fékk við illan leik og eftir svolítið japl líka skrifstofu. Utan Íslands vill fólk fá svör og það vill ekki fá þau svör á íslensku. Það vill fá þau á mannamáli. Hreinskipt svör. Heiðarleg svör. Greinagóð svör. Ekki “þetta er flókið.” Ekki, “þetta tekur tíma.” Ekki, “ekki benda á mig.” Svör sem sýna nákvæmlega hvort að það var heimska eða glæpsamlegur ásetningur sem orsakaði einhverja stærstu gripdeild á sparifé sem heimurinn hefur nokkurn tímann séð.
Tags: Andri Helgason, bankahrunið, Egill Helgason
Auðvitað er fæðingarorlof skorið niður
Sé að það er allt vitlaust heima á klakanum yfir niðurskurði á fæðingarorlofinu. Held að menn ættu bara að prísa sig sæla yfir því að allt fæðingarorlofskerfið var ekki lagt niður eins og það lagði sig. Ríkissjóður er jú á hvínandi kúpunni og fæðingarorlof er ákveðinn lúxus sem einungis ríkar þjóðir geta leyft sér. Vita lesendur annars hvort svona kerfi fyrirfinnast í öðrum löndum?
Það er alltaf leiðinlegt að sjá á bak ýmsum þægindum sem fólk hefur vanið sig á. En svona er Ísland í dag víst og ekkert hægt að gera í því lengur. Leita verður allra leiða til að skera niður í opinberum rekstri og auðvitað er alltaf einhver sem tapar á því.
Menn verða einfaldlega að horfast í augu við þá staðreynd að Ísland er nokkrum klössum neðar eftir bankahrunið. Þakkið fyrir að Ísland fer ekki niður á mexíkanska stigið en á því stigi eru engar barnabætur, atvinnuleysisbætur, örorkubætur, vaxtabætur, fæðingarorlof, ellilífeyrir o.s.frv. Hér í landi er hlegið að svona lúxusvandamálum eins og að einn mánuður verði klipinn af fæðingarorlofi.
Tags: bankahrunið, fæðingarorlof, Ísland
Borðið það sem ég segi
Nokkuð undarlegt er að fylgjast með umræðunni um landbúnaðarmál heima í tengslum við væntanlega ESB aðild Íslands. Margir sem vilja ákveða fyrir fólk hvað það á að setja ofan í sig. Neytendur eiga ekki að hafa val um hvað þeir kaupa heldur eiga þeir að sætta sig við það sem íslenskir bændur framleiða. Talað er af megnri fyrirlitningu um erlend matvæli, þau kölluð menguð og þar fram eftir götunum.
Magnað að þessir sjö milljarðar af fólki sem fær ekki að njóta íslenskra matvæla geti yfirhöfuð lifað af.
Næsta rökrétta skref væri líklega að banna unglingum að spila aðra tölvuleiki en EVE-online þar sem íslenskir tölvuleikir eru mestir og bestir og tryggja þarf afkomu íslenskra forritara.
Í alvöru talað, það þarf að breyta íslensku landbúnaðarkerfi. Þeir sem verja það eru að verja mjög vondan málstað. Núverandi kerfi hefur ekkert gert nema fest bændur í fátæktargildru, gert þá háða ríkisstyrkjum, er mjög dýrt í rekstri fyrir íslenska ríkið og íslenskir neytendur borga margfalt hærra verð fyrir sína matarkörfu. ESB-aðild leysir ekki vandann en væri ágæt byrjun á því að brjóta upp kerfið.
Tags: ESB, EVE-online, landbúnaður
Óhefðbundnar lækningar eru kreddur
Mér hefur alltaf fundist þetta orðasamband “óhefðbundnar lækningar” vera villandi. Sjálfur tengi ég óhefðbundið við eitthvað ferskt og nýtt, eitthvað sem fer út fyrir rammann.
Sumar þessara óhefðbundnu lækninga eru ævafornt fyrirbrigði eins og t.d. nálastungur og jurtalækningar. Nálastungur hafa verið stundaðar í einhver þúsund ár og hafa ekkert breyst í tímans rás. Erfitt er að finna dæmi um hefðbundnara fyrirbrigði í nútímanum.
Nær væri í sögulegu samhengi að tala um nútíma læknavísindi sem óhefðbundnar lækningar, sé litið til langs tíma.
Best væri þó að nota hið góða íslenska orð skottulækningar og/eða kukl yfir það sem nú kallast óhefðbundnar lækningar. Vafasamt er að tengja orðið lækningar við margt það sem fram fyrir undir merkjum græðara og annara skottulækna.
Tags: kukl, óhefðbundnar lækningar, skottulækningar
Nýr heilbrigðisráðherra er vanhæfur
Álfheiður Ingadóttir er ekki heppilegur heilbrigðisráðherra. Reyndar er leitun á verri valkosti úr þeim þingmönnum sem stjórnin samanstendur af. Sjá t.d. þessi ummæli á Alþingi fyrir um ári síðan.
Ég tel ástæðu til að minna á nauðsyn þess að óhefðbundnar lækningar fái viðurkenningu í heilbrigðisþjónustu okkar og sérstaklega hvatning til að breyta líferni og bæta mataræði og hreyfingu. Það er mikilvægt að við leggjum meiri áherslu á þessa hluti en verið hefur og meiri áherslu en á lyf og læknisaðgerðir. #
Á nú að mylja meira undir bölvað kuklið í íslenskri heilbrigðisþjónustu? Þetta er ömurlegt vægast sagt. Slær út Svandísi í ruglinu. Ég vil fá Ögmund aftur!
Tags: Álfheiður Ingadóttir
Sagan endalausa
Frábært. Svo virðist sem það hafi verið gulltryggt á Íslandi í síðustu viku að pólitísk umræða á áfram eftir að snúast í kringum orð Davíðs Oddssonar. Áður fyrr voru það drottningarviðtöl í sjónvarpi, hér eftir verða það leiðarar Morgunblaðsins.
Nýja Ísland féll undraskjótt í far hins gamla.
Tags: Davíð Oddsson
Hægrimenn elska Jóhönnu
Fæ ekki betur séð af umræðunni heima en að Jóhanna Sig sé vinsæl í starfi. Einnig hjá hægri mönnum þar sem helsta umkvörtunarefni þeirra er að hún sjáist ekki nóg í fjölmiðlum.
Tags: Jóhanna Sigurðardóttir
Umhverfisráðherra á villigötum
Ég var fluttur af landi brott þegar Svandís Svavarsdóttir varð pólitísk stjarna í sveitarstjórnarkosningunum 2006. Hef því lítið lesið eða heyrt frá henni hér í útlandinu. Nú á hún víst að heita umhverfisráðherrra og svona hefst ferillinn hjá henni.
Svandís Svavarsdóttir umhverfisráðherra segir að Ísland muni slást í hóp ríkja sem lagst hafa gegn erfðabreyttri ræktun matvæla innan ESB verði landið aðili að Evrópusambandinu. #
Það er satt best að segja ömurlegt að heyra svona tal. Erfðabreytt matvæli eru helsta von okkar í baráttunni við hungurvofuna sem sífellt vofir yfir fátækari löndum. Skammsýnir og fáfróðir stjórnmálamenn sem hafa lagst gegn þessari tækni vegna einhverra tilfinningaraka eða trúarbragða hafa valdið ómældu tjóni nú þegar og seinkað nauðsynlegri framþróun í þessum málum.
Almenn samstaða er um það meðal vísindamanna að engin hætta stafi af erfðabreyttum matvælum sé vissum varúðarráðstöfunum fylgt. Ég vona að einhver menntaður á þessu sviði sé starfandi í umhverfisráðuneytinu sem getur frætt ráðherrann um þessi mál áður en það verður um seinan.
Tags: erfðabreytt matvæli, Svandís Svavarsdóttir
Sorglega heimskulegt lögbann
Kaupþingi hefur verið stjórnað af hálfvitum síðustu árin og enn bæta þeir gráu ofan á svart í sorgarsögu sinni. Nýjasta er að þeir setja lögbann á birtingu efnis í ríkisútvarpinu sem er öllum aðgengilegt á Wikileaks. Með þessu hafa þeir líklega komið í veg fyrir tímabundið að nokkur prósent þjóðarinnar sem hefur ekki aðgang að netinu og skilur illa ensku komist að því hvað þessir drulluhalar voru að braska rétt fyrir hrunið. En fyrir flesta er þetta að sjálfsögðu of seint sem betur fer.
Mikið er maður annars þakklátur fyrir Netið á þessum síðustu og verstu tímum. Held að fátt hafi hjálpað lýðræðinu og frjálsri fjölmiðlum meira en Netið, kannski í gjörvallri sögu mannkyns. Hér áður fyrr gátu valdaklíkurnar ginið yfir gömlu fjölmiðlunum og sagt þeim fyrir verkum en sá tími er sem betur fer liðinn.