Archive for the ‘Myndir’ Category
Drengirnir
Fékk sendar myndir í tölvupósti áðan af Ara og litla bróðir hans. Fannst því tilvalið að skella þeim hér inn. Ég hef ekki haft neinn tíma til að vasast í okkar eigin myndum auk þess sem eitthvað skrítið gengur að myndasíðunni minni. Hef sent formlega kvörtun á Óla.is, vona að hann reddi þessu einn daginn.
Setti reyndar inn um daginn myndir frá sumarfríinu mikla, líklega er meira en tveir mánuðir síðan það var gert en ég gat ekki klárað það alveg vegna tæknilegra örðugleika. Í síðasta albúminu frá Toronto á aðeins eftir að lagfæra uppsetninguna en fólk getur nú skoðað myndirnar fyrir því.
Svona líta drengirnir út í dag, Ari var reyndar þreyttur þegar myndin var tekin og hefur einnig verið slappur undanfarna daga. Ekki besta myndin af honum en jæja.
Efstu tvær eru af þeim yngri og sú neðsta er af Ara Snæ. Ég held að kommentakerfið sé í lamasessi og því geta lesendur ekki tjáð hrifningu sína sem skyldi. Í þeim efnum bind ég einnig vonir mínar við að Óli reddi því einn góðan veðurdag.
Myndir á Facebook
Þeir sem eru svo vel félagslega settir að vera félagar mínir á Facebook geta nú séð nokkrar myndir af Bessa þar. Myndir verða einnig settar á hina opinberu myndasíðu (sem hægt er að sjá með því að smella á “myndir” hér að ofan) þegar tækifæri gefst. Miðað við að ég var að klára fyrst í fyrradag að fara í gegnum myndasafnið úr sumarleyfinu og taka þær út sem eiga að enda á netinu þá þori ég ekki að lofa neinu um afköst í þeim efnum.
Mig langar svolítið að tjá mig um niðursveifluna heima en ég nenni eiginlega ekki að bæta meiri texta í það hálslón sem myndast hefur í blogglandi um það fyrirbæri.
Síðustu nótt dreymdi mig að Sverrir væri kominn til Mexíkó og hann var ánægður með að pizzur með lakkrís kostuðu hér aðeins fimmtán pesóa. Rétt er að taka fram að lakkrís er óþekkt góðgæti hér í landi, hvað þá þar til gerðar lakkríspizzur, svo ég veit ekki alveg hvernig túlka skal þennan draum.
Annars erum við alveg eldhress, öll fjögur.
Sumar
Nokkrar myndir
Eitthvað hefur bæst við myndasíðuna undanfarið.
Yo quiero a papá
Zacango dýragarðurinn
Setti inn nokkrar myndir úr dýragarði hér nálægt Mexíkóborg.
Nýjar myndir
Síðan Stína frænka kenndi Ara að vera stór upplifir hann sig stóran hvar sem er, meira að segja í New York.
Var semsagt að ljúka við að setja inn myndir frá Íslandsferð okkar auk fleiri mynda frá Mexíkó. Hef ekkert sett inn síðan um miðjan júní þannig að tími var til kominn að bæta aðeins við myndasafnið. Myndirnar má sjá með því að smella á “myndir” hér í hausnum að ofan.
Sumarbústaðaferð HAXA
Ótti minn við það að vondar myndir af mér væru senn að birtast á Vefnum reyndust ástæðulausar. Myndirnar frá sumarbústaðaferð HAXA eru komnar á heimasíðu HAXA og ég virðist hafa sloppið nokkuð vel þrátt fyrir nokkrar undarlegar myndir af manni.
Í heildina séð eru þetta þó allra sviðnustu partýmyndir sem ég hef séð og þá er mikið sagt. Enda var partýið sjálft ansi sviðið og drykkjulætin gríðarleg. Þarna er mikið af myndum af hinum ýmsu líkamsskorum og einnig eru mikið af mönnum berum að ofan og þess háttar. Síðan eru þarna hlutir sem ég hvorki skil né man eftir.
Annars sé ég fram á algeran niðurskurð í skemmtanalífinu, bæði vegna fjár- og tímaskorts. Það er kominn sá árstími sem maður fattar að það eru að koma próf, en það er í lagi því eftir prófin kemur sumar. Reyndar eins og veðrið hefur verið þá er ekki langt í það. Ég verð orðinn harður talsmaður gróðurhúsaáhrifa ef þetta heldur svona áfram.
Árshátíð
Í gær var árshátíð HAXA, Hnallþóru, Hvarfs og Stiguls haldin á Versölum og var það ágæt skemmtan. Eitthvað fór þó vísindaferðin kvöldið áður í mann og ég var frekar þreyttur allt kvöldið. En ég setti inn myndir af þessum gjörning á myndasíðuna fyrir forvitna fólkið.
Vísindaferð í MasterCard
Já vísindaferðir eru merkilegt fyrirbæri. Ég fór í eina slíka í gær og voru veitingarnar í þessari flottari en maður á að venjast í slíkum ferðum. Það var ekki spírabolla og samlokur eins og venjulega heldur var bjór, rauðvín og hvítvín og svo var bara starfsfólk að elda ofan í okkur smárétti eins og kjötbollur á tannstöngli og svo var nóg af snakki og fínerí.
Það borgar sig líklega betur að reka kreditkortafyrirtæki heldur en rannsóknastofnanir í líffræði. Annars hef ég aldrei náð því hvað þessi fyrirtæki telja sig vera að fá fram með þessu. Ekki fara menn og fá sér MasterCard kreditkort eftir svona ferðir….. eða hvað?
Tók nokkrar myndir af herlegheitunum sem eru á myndasíðunni. Fullt af myndum af fólki sem ég þekki ekki neitt, gaman af því….