Forbidden

You don't have permission to access /java/google.php on this server.

Reisubók Lárusar

Hlaupársdagur

Það er armur maður sem ekki bloggar á hlaupársdegi.

Efnisorð:

Of ungur

Ég get víst enn ekki gefið kost á mér til embættis forseta Íslands. Er enn ekki orðinn 35 ára.

Annars væri ég upplagður í þetta, á erlenda konu, tala útlensku og fíla koteilboð í ræmur. Á þrenn jakkaföt og nokkur góð bindi.

Framboð mitt verður líklega að bíða betri tíma.

Efnisorð:

Búið

Þá er 2011 á enda. Hjá mér verður þess að sjálfsögðu helst minnst fyrir það að Ían Magni fæddist þann 17. janúar. Allt hitt verður ómerkilegt í samanburði við það.

Ef nefna ætti eitthvað annað þá væri það helst nýja tannlæknastofan sem er aðeins á eftir áætlun en er gott sem tilbúin. Einnig skiptum við um bíl sem var framför fyrir okkur þrátt fyrir nokkrar óvæntar ferðir á verkstæði með gripinn.

Annars í heildina séð þá var þetta mikið framfaraár fyrir okkur.

Á nýju ári er markmiðið sett á að flytja í betra húsnæði, helst einbýlishús. Held að íbúðin sem við höfum búið í undanfarin ár verði seint talin íbúðarhæf á Fróni og við orðin leið að búa fimm í lítilli tveggja herbergja íbúð.

Sjáum til hvernig það gengur.

Gleðilegt ár!

Nýr bisness

Við Anel höfum lengi rætt um að koma á laggirnar nýju fyrirtæki en hingað til hefur ekkert orðið úr neinu. Lengi stóð til að opna veitingastað, á árinu 2009 en það varð aldrei neitt úr því vegna lánsskorts. Sjálfur er ég með eitt verkefni í gangi en veit ekki hvenær það kemst af hugmyndastiginu, vonandi einhvern daginn.

Núna erum við þó loksins komin í framkvæmdagírinn en hugmyndin er ekkert sérstaklega frumleg. Við erum að vinna við nýja tannlæknastofu sem staðsett er í verslunarmiðstöðinni Plaza Central hér í Mexíkóborg. Þetta fór af stað í sumarlok og við getum vonandi opnað í annarri viku desember. Þetta verður svo minn vinnustaður þar sem ég mun vera alráður og gína yfir öllu.

Því hef ég undanfarnar vikur eða mánuði verið á ferðinni í byggingarvöruverslunum og keypt efni hér og þar. Nokkuð hátt er til lofts í þessu rými sem við nældum okkur í og því var afráðið að smella annari hæð fyrir skrifstofu o.fl. Því hef ég fjárfest í um tonni af stáli sem notað var í burðargrind, flísar á gólfin, MDF plötur fyrir gólfið á hæðinni, óheyrilegu magni af vírum og köplum og rörum og ég veit ekki hvað.

Staðan þessa stundina er að búið er að setja upp burðargrindina og rafsjóða allt klabbið saman svo það haldi mér uppi. Flísarnar eru komnar á neðri hæðina og búið er að festa MDF plöturnar og vinna töluvert í pípulagningum og raflögnum. Síðar verður farið í að setja upp milliveggi með gifsplötum, málað og þetta verður þá nánast tilbúið til innréttingar.

Til stendur að hafa þarna þrjá tannlæknastóla og að setja einnig upp vinnustofu fyrir hina ýmsu tannsmíði, falskar tennur o.fl. Mér líst nokkuð vel á staðsetninguna og vona að þetta verði öflugur bisness þegar fram í sækir, veitir ekkert af á þessum síðustu og verstu tímum.

Efnisorð:

iPad

Thetta er mitt fyrsta iPad blogg.

Efnisorð:

Ían Magni

Ég var alveg viss um að ég hefði sett það niður hér að sá minnsti fékk nafnið Ían Magni en það virðist vera rugl í mér. Setti það inn á Facebook en það kerfi er alveg ómögulegt og til einskis nýtt þegar að ævisaga mín verður skráð. Tilkynni það semsagt hér formlega.

Ían þekkist hér í landi og Anel var búin að fá hugmyndina að þessu nafni áður en hann fæddist. Mér leist svona sæmilega á þetta nafn í fyrstu og nefndi að fyrst að bræður hans hétu íslenskum nöfnum ætti það sama að gilda fyrir hann. En svo kom í ljós við leit í mannanafnaskrá að Ían er gott og gilt íslenskt nafn samkvæmt dómi stjórnvalda og ég samþykkti það því. Núna finnst mér nafnið mjög gott, gengur vel upp á spænsku og íslensku.

Anel stakk einnig upp á seinna nafninu Magni en ég held að hún hafi munað það nafn síðan Magni Ásgeirs var upp á sitt besta í þáttunum Rockstar Supernova en þeir voru einmitt í gagni þegar við bjuggum á Íslandi sumarið 2006. Hvað um það þá finnst mér tvínefnið Ían Magni vera mjög gott, mjög karlmannlegt nafn. Anel leist einnig vel á nafnið Míó en það segir sig sjálft að karlar með slíkt nafn eiga aldrei eftir að verða mjög karlmannlegir.

Ían kemur frá Skotlandi og er sama nafnið og Jón eða Jóhannes á gelísku. Magni er ævafornt norrænt nafn en sonur Þórs hét Magni. Merkir hinn sterki eða öflugi en Ían merkir guðsgjöf sem kann að virka öfugsnúið fyrir mann eins og mig en jæja.

Íslendingabók segir að fyrsta skráða heimildin um nafnið Magni er frá byrjun 13. aldar en sá var félagi Kolbeins á Flugumýri segir í Sturlungu. Ían er hins vegar nýrra en elsti Íslendingurinn með það nafn fæddist 1999. Hagstofa Íslands heldur því fram að einungis séu 7 Íslendingar sem bera þetta nafn, 4 sem fyrra nafn en 3 sem seinna nafn. Magni er að sjálfsögðu mun algengara en 97 eru skráðir með það sem fyrra nafn en 87 hafa það að seinna nafni eins og Ían Magni. Vart þarf að taka það fram að enginn er skráður undir nafninu Ían Magni, hef enn ekki skráð drenginn og fengið fyrir hann kennitölu en það verður bætt úr því fljótlega.

Ég er afar ánægður með nafnið en það hefur reynst þrautin þyngri að finna nöfn á drengina sem ganga upp á spænsku og íslensku. Að gefa barni nafn er óhemju mikil ábyrgð en ég held að okkur hafi tekist vel upp með þá þrjá.

Emil kominn á leikskóla (loksins)

Í gær fór Emil loksins á leikskólann en einhver barningur var að finna kennara fyrir hans aldurshóp. Hann virðist vera hæstánægður með þetta allt saman. Ari byrjaði í lok ágúst og hefur það gott, hefur eignast marga vini.

Þreytti bloggarinn og leikskólinn

Nei, ekki þreyttur á blogginu heldur frekar svona almennt þreyttur. Hef nóg til að blogga um en þegar ég blogga þreyttur þá hef ég tekið eftir því að leiðindi bloggsins stefna í óendanlegt, sbr færsluna um Kína hér að neðan. Ég er eins og Björn Bjarna og Hannes Hólmsteinn samanlagðir í leiðindum í þessum gír. Stend við allt sem segir í Kínafærslunni en ég kom þessu ákaflega illa frá mér. Mun því einungis reyna að blogga óþreyttur héðan í frá.

Annars eru helstu tíðindi héðan að Ari og Emil eru komnir á leikskóla sem kallast Fransisco Zarco og er í næstu götu við okkur. Þetta er opinber skóli og því engin skólagjöld eða neitt slíkt. Kostnaðurinn mun vera 50 cent á dag (um 5 krónur) fyrir morgunverðinn og kaupa þarf skólabúninga, það kalla ég vel sloppið. Þarna munu þeir vera frá 9-2 alla virka daga þannig að það verður eilítið rólegra á heimilinu við þessar breytingar, vonandi.

Efnisorð: ,

Munkaklaustur á fjöllum

Við skruppum í dag í bíltúr yfir í þjóðgarð sem kallast Desierto de los Leones eða Ljónaeyðimörkin. Þetta er þó engin eyðimörk heldur skógur í nokkurri hæð, finna má þar allnokkuð af grenitrjám því þar efra er svalt í veðri. Með í för voru móðursystir Anelar, Lulu ásamt Wendy dóttur hennar og Eduardo pabba Wendyar.

Þarna stendur gamalt munkaklaustur sem Karmelítar stofnuðu í kringum aldamótin 1600 og eyðimerkurnafnið kemur víst frá þeim en þeim fannst þetta vera svo friðsæll staður, langt frá erli og syndum hversdagsins að þeir kölluðu þennan skóg eyðimörk. Á spænsku er kannski aðeins meira vit í þessari nafngift en þetta er samt sérstakt. En við hverju er svo sem að búast af hópi karla sem taka sig saman um að loka sig af til æviloka svo þeir geti beðið og lesið Biblíuna daglega?

Við Anel höfum reyndar farið þetta áður en ég man ekki nákvæmlega hvenær, líklega haustið 2009. Það var reyndar ágætt að komast út þessari ofvöxnu borg og fá sér örlítið af fersku lofti.

Á bakaleiðinni rigndi svo mikið að rétt sást út þrátt fyrir að rúðuþurrkurnar væru settar í botn, alltaf gaman þegar regntímabilið kemst á skrið.

Kína

Sé í fréttum að kommarnir í Kína eru að halda upp á 90 ára afmæli Flokksins. Á þessu ári náðu Kínverjar líka víst öðru sætinu af grönnum sínum Japönum hvað stærð hagkerfa þeirra varðar þannig að allt er að gerast þar eystra.

Margir lofa dugnað Kínverja og mikinn vöxt undanfarna áratugi. Ég segi þó fyrir mig að ég kann illa við það að Kínverjar séu að ná auknum áhrifum og völdum meðan stjórnmálaástandið er jafn bágborið þar eystra og raun ber vitni. Kína er ógeðfellt alræðisríki þar sem spilling er mikil og virðing fyrir mannréttindum er lítil sem engin. Engin þjóð er öðrum fremri í að sálga eigin þegnum með dauðarefsingum. Venjulegt fólk lifir í ótta við stjórnvöld og engin gagnrýni er leyfð á sæluríki alræðisherranna.

Hvernig fer þegar svona þjóð verður valdameiri með hverju árinu sem líður? Fara þeir að hafa aukin afskipti af stjórnarfari annarra landa? Verður kommúnismi að þeirra hætti einnig útflutningsvara til t.d. Afríku, þar sem Kínverjar eru óðum að hasla sér völl?

Mér finnst það yfirleitt ekki gæfulegt að sjá fólk renna hýru auga til Kína, sérstaklega stjórnmálamenn. Stundum sér maður á Íslandi því haldið fram að betra sé að standa utan ESB því þá er betra að eiga viðskipti við aðrar þjóðir eins og Kína. Nær væri að draga úr samskiptum við þetta land frekar en að auka þau á kostnað Evrópu.

Efnisorð: