X-faktorinn

Þvílíkar krásir sem á að bera á borð fyrir mann. Bakkynjur eftir Evripídes! Vona innilega að því verði ekki fokkað upp með því að láta Díónysus stíga dans undir hiphop-tónlist um leið og hann flytur einræðurnar sínar eða eitthvað álíka. Minnir að akkúrat þetta hafi verið gert í Ríkharði III hérna um árið og það var glatað. Sú uppfærsla var líka öll frekar glötuð.

Og svo eru allar bækurnar sem ég fékk í jóla- og afmælisgjöf:

1984 e. Orwell (með inngangi e. Pynchon!)
Fjúkandi lauf e. Einar Ásmundsson (????)
Kvæðasafn e. Snorra Hjartarson
Le Chat, son maitre et ses deux maitresses (frönsk þýðing á módernískum nóvellum eftir japanskan höfund sem ég man ekki hvað heitir)
Skáldalíf e. Halldór Guðmunds
Sumir láta eins og holdið eigi sér takmörk e. Véstein Lúðvíks
Utopia e. Sir Thomas More

Veiveivei!

Gleðilega hátíð öllsömul sem lesið þetta. Ef þið senduð mér kort biðst ég velvirðingar á slugsahættinum í mér að hafa ekki goldið ykkur líkt með líku. Ég sendi engin kort. Þakka sömuleiðis kærlega fyrir gjafirnar sem ég fékk núna yfir afmæli og jól; nóg af bókum, gagnlegum hlutum í eldhúsið og gourmet-dóti allskonar. Þessi jól verða færð í annála sem kaffijólin þar sem mér hefur hlotnast grúví stöff eins og pressukanna, fallegt bollastell og sérmalað kaffi.

Það gisti óður
minn eyðiskóg
er ófætt vor
bjó í kvistum,
með morgunsvala
á sólardyr
leið svefninn ylfrjór
og góður.

Ég fékk kvæðasafn Snorra Hjartarsonar í afmælisgjöf í gær. Ég er geðveikt ánægður.

Ef einhverjir eru að vesenast með jólagjafir í dag, Þorlák, þá er ég búinn með Hið stórfenglega leyndarmál heimsins eftir Steinar Braga og mæli hiklaust með henni, fín bók.

Ég er ekki frá því að að Orville smjörpopp fari langleiðina með að réttlæta mannlega tilveru. Andmæli mér hver sem þorir.

Þú ert fullkomin núna: ég hef slegið á þig
smiðshöggið og kveð því návist þína um óákveðinn
tíma. Orð mín höfðu tilætluð áhrif og þú þagðir eins
og barnið sem veltir því vandlega fyrir sér hvort
tunglið sé virkilega ekki úr osti.
Ég fann loksins rétta lykilinn að þér og skildi
að ég gat hætt að fitla laumulega við skráargatið.
Ég held þig gruni ekki neitt. Ég held ég geti
laumast til að opna þig örlítið án þess að þú takir eftir
því næst þegar við hittumst. Ég fer bara varlega – skref
fyrir lítið skref: ég óttast þig ekki.

Davíð A. Stefánsson, úr bókinni ‘Kveddu mig’, Nykur 1999.

Forvalið er búið og það var mjög gaman í því. Flott fólk í efstu sætin og mér skilst að mér sjálfum hafi nú bara gengið nokkuð vel, svona miðað við að ég hagaði mér eins og fífl alla kosningabaráttuna. Guðrún Lilja fékk ljómandi góða kosningu í annað sætið. Ég óska henni til hamingju með það. Hins vegar vil ég segja, bara af því að ég þekki nákvæmlega ekki neitt til hennar né hennar starfa, að ég vona sannarlega að hún muni standa undir þessum mikla stuðning og sanna sig sem öflugur málsvari þessa göfuga flokks.

Annars er mjög einföld ástæða fyrir því að ég náði ekki fjórða sætinu: hún er sú að kvöldið fyrir kjördag þá lamdi ég talningarmanninn minn. Fyrirgefðu Jón!

####

Ég er fluttur aftur í bráðhuggulega íbúð að Laufásvegi 71, jarðhæð, og þangað er allt gott fólk ævinlega velkomið því mér þykir gaman að fá gesti. Nú GET ég líka boðið heim gestum, ólíkt herberginu á Urðarstígnum þar sem varla var pláss til að klóra sér. En úkraínska konan sem var leigusalinn minn á Urðarstígnum reyndist mér vel; hún lét mig afskiptalausan, var aldrei með leiðindi og skilaði tryggingunni minni. Það er meira en sagt verður um síðasta leigusala sem var Íslendingur, var með sífellt bögg út af því sem var ekki mér að kenna, spillti öllum heimilisfriði og stal tryggingunni minni.

Ég fékk nokkra stælta karlmenn, fíleflda og fagurlimaða, til að hjálpa skáldinu við burðinn, og var það unun á að líta. Ég þakka þeim hér aftur, þessum Herkúlesum.

####

Framsóknarmaðurinn og Selfyssingurinn Bjarni Harðarson fór mikinn í pistli í Blaðinu um daginn. Þar reifaði hann hvað Vinstri græn séu mikill öfgaflokkur sem hýsir dreggjar heimskommúnismans í sínum röðum og að VG sé öfgaflokkur sem haldi á lofti stefnu kúgunar og ofbeldis. Hann klykkir út með að segja að það sé líkast til eitthvað að uppeldinu á fólki sem gengur svona öfgaflokkum á hönd. Svona kjaftæði á það til að fara ansi mikið í taugarnar á mér. Hvað er að manninum? Er hann öfga-framsóknarmaður sem er að skíta í buxurnar af því að fyrrum kjósendur Framsóknar hafa snúið baki við þeirri úrkynjuðu flokksómynd og komið yfir í það heimbrigða og ferska afl sem VG er? Er hægt að taka einhverja pillu til að koma í veg fyrir að svona vitleysa pirri mann?

Jólasveinninn Froðufellir var einu sinni “til” en var svo óheppinn að hljóta ekki náð fyrir augum Jóhannesar úr Kötlum þegar hann orti sínar ódauðlegu jólasveinavísur. Það er klárlega algjört sköll að Froðufelli hafi verið svo gróflega mismunað. Hann verðskuldar uppreist æru. Hann yrði glaður því hann fengi að vera með og börnin yrðu glöð því þau fengju eina gjöf í viðbót. Allir sáttir. Áfram Froðufellir! Froðufelli á þing!

Jæja forvalið er á morgun og allir alveg hreint að farast úr æsingi yfir því. Þessu forvali fylgir það lúxusvandamál að það eru svo margar öflugar konur í framboði að maður á sjálfsagt eftir að fá valkvíða. Kata
á pottþétt að komast á þing, og Auður Lilja
á að fá góða kosningu. En að öllum öðrum ólöstuðum skora ég á alla að veita Álfheiði Ingadóttur
brautargengi og láta hana í 1. sæti. Held að það finnist ekki mikið öflugra fólk en Alfí.

Já, og ekki gleyma að láta mig í 3. sæti, því ég er smart í tauinu og mæti þunnur á frambjóðendafundi. Og er svona all-round góður gæi.