Fuglastríðið

Ég kaupi miða í rútuna til Mostar og hef kortér til stefnu, ég er glorsoltinn og kaupi því vafasaman hamborgara í sjoppunni - og áður en ég hef svo mikið sem sest niður og byrjað að missa niður mylsnu hafa fuglarnir hópast að mér. Ég nýt vitaskuld athyglinnar og bý mér til smá bíó með matnum með því að henda brauðbitum af borgaranum reglulega til hópsins. Þetta eru ýmist dúfur og einhvers konar snjótitlingar - og alltaf eru snjótitlingarnir sneggri til. Dúfurnar eru vissulega mun stærri en miklu þunglamalegri - og jafnvel þegar ein þeirra nær brauðbita tekur einn smáfuglinn hana á kraftinum og rífur brauðið af henni - og ég get ekki annað en hugsað; hvernig í ósköpunum stendur á því að þessir fuglar eru ekki útdauðir? Þeir eiga ekki séns í ræfils smáfuglana, hvað þá hættulegri andstæðinga.